ДДҰ басшысы Қазақстан Президен…
Дүниежүзілік денсаулық сақтау ұйымының (ДДҰ) Бас директоры Тедрос Аданом Гебрейесус Қазақстан Президенті Қасым-Жомарт Тоқаевтың алғашқы медициналық-санитариялық көмек (АМСК) учаскелік қызметі медицина қызметкерлерінің жалақысын арттыру туралы шешімін қолдады.
ДДҰ басшысы өзінің Facebook парақшасында Қазақстан Президенті Қасым-Жомарт Тоқаевтың еліміздегі 77 мың медицина қызметкерінің жалақысын арттыруға бағытталған бастамасына жоғары баға беріп, халықтың денсаулығы мен әл-ауқатын мемлекеттік саясаттың басым бағыты ретінде қарастыру ұстанымын атап өтті.
Доктор Тедрос Аданом Гебрейесустың айтуынша, алғашқы медициналық-санитариялық көмекке инвестиция салу және медицина қызметкерлерін қолдау арқылы Қазақстан саяси ерік-жігер мен көшбасшылықтың медициналық қызметтердің сапасы мен қолжетімділігін арттыруға ықпал ететінін көрсетіп отыр.
Учаскелік қызмет мамандарының жалақысын арттыру — тек материалдық қолдау ғана емес, сонымен қатар денсаулық сақтау жүйесіндегі алғашқы буын қызметкерлерінің маңызды рөлін мойындау.
Өйткені дәл осы мамандар пациенттің денсаулық сақтау жүйесіне алғашқы жүгінетін орны болып табылады. Олар халықтың денсаулығын тұрақты бақылап, ауруларды ерте кезеңде анықтауға және алдын алуға, сондай-ақ тұрғындардың денсаулығын сақтауға елеулі үлес қосады.
ҚР ДСМ академик Н.Ж.Батпенов атындағы Ұлттық ғылыми травматология және ортопедия орталығы ДДҰ Бас директоры Тедрос Аданом Гебрейесуске Мемлекет басшысының шешімдеріне жоғары баға беріп, еліміздің алғашқы медициналық-санитариялық көмекті нығайту бағытындағы бастамаларын қолдағаны үшін алғыс білдіреді.