ҰҒТОО-ДА ХАЛЫҚАРАЛЫҚ HKA 2026 …
30–31 қазан күндері Астана қаласында жамбас және тізе буындарын күрделі эндопротездеу мәселелеріне арналған халықаралық ғылыми-практикалық конференция өтті. Іс-шараны академик Н.Ж.Батпенов атындағы Ұлттық ғылыми травматология және ортопедия орталығы Қазақстан травматолог-ортопедтер қауымдастығымен бірлесіп ұйымдастырды.
Конференцияның құрметті қонағы буындарды эндопротездеу саласындағы әлемге танымал сарапшылардың бірі, перипротездік инфекция мәселелері жөніндегі Халықаралық консенсус конференциясының (ICM) негізін қалаушы әрі төрағасы, профессор Джавад Парвизи болды. Ол шетелдік әріптестерімен бірге буындардың күрделі патологиялары мен операциядан кейінгі асқынуларды емдеу тәжірибесімен бөлісті.
Конференцияға Қазақстан, Түркия және Ресейдің жетекші травматолог-ортопедтері қатысты. Олардың қатарында Түркия эндопротездеу қауымдастығының президенті, профессор Ибрагим Тунчай, Ресейдің Чебоксары қаласындағы Травматология, ортопедия және эндопротездеу федералдық орталығының директоры Николай Николаев, сондай-ақ Санкт-Петербург қаласындағы Р.Р. Вреден атындағы Ұлттық медициналық травматология және ортопедия ғылыми-зерттеу орталығы директорының орынбасары Игорь Шубняков бар.
Конференцияның басты ерекшелігі – нақты клиникалық жағдайларды талқылауға негізделген интерактивті формат. Дәстүрлі баяндамалардың орнына қатысушылар халықаралық сарапшылармен пікір алмасып, сұрақтар қойып, күрделі клиникалық жағдайларда емдеу тактикасын бірлесіп талқылады.
Бағдарламаның маңызды бөлігі Live Surgery форматындағы операция болды. ҰҒТОО ортопедтері профессор Джавад Парвизимен бірлесіп, перипротездік инфекцияға байланысты тізе буынына бір кезеңді ревизиялық эндопротездеу операциясын жасады. Операция тікелей эфирде көрсетіліп, клиникалық жағдай, таңдалған емдеу тактикасы және хирургиялық араласудың негізгі кезеңдері түсіндірілді. Қатысушылар операция барысында мамандарға сұрақ қойып, нақты уақыт режимінде жауаптар алды.
Конференция отандық травматология және ортопедия саласы үшін әлемдік жетекші мамандармен тікелей тәжірибе алмасуға мүмкіндік берген маңызды кәсіби алаңға айналды. Мұндай халықаралық ынтымақтастық Қазақстанның ортопедия мектебін дамытуға, хирургиялық әдістерді жетілдіруге және халыққа көрсетілетін мамандандырылған медициналық көмектің сапасын арттыруға ықпал етеді.
